Goslokahátíðin 2019

Myndlistarsýning Tolla í flugstöðinni:

Eyjamenn kolféllu fyrir verkum hans

 

 

Fyrstur til að opna sýningu á gosloka- og afmælishátíðinni var Tolli Morthens sem var með sýningu á nýjum olíumálverkum á Vestmannaeyjaflugvelli. Sýningin, sem stendur enn er samvinnuverkefni Isavia, rekstraraðila flugvallarins, og Tolla. Sýningin hefur ferðast um landið fyrst í flugstöðinni á Egilsstöðum í september í fyrra. Auk Egilsstaða og nú Vestmannaeyja hefur Tolli boðið upp á samskonar sýningar í flugstöðvunum á Akureyri og Ísafirði. Sýningin mun standa fram yfir verslunarmannahelgi.

 

Tolla þekkja margir og þeir létu sig ekki vanta við opnunina þar sem Heimaklettur var áberandi í verkum listamannsins. Tolli er þekktur fyrir stórar myndir og hann er óhræddur við að nota skæra og bjarta liti. Það virtist falla Eyjamönnum vel í geð því hann seldi grimmt þrátt fyrir há prísa.

 

Tímasetning sýningar Tolla var ekki tilviljun. Goslokahátíð og hátíðarhöld vegna 100 ára afmælis Vestmannaeyjabæjar hófust þennan dag, 4. júlí. Sýning Tolla er hluti af þeim hátíðarhöldum.

 

Sýningin í flugstöðinni í Vestmannaeyjum er sú síðasta í röðinni hjá Tolla að fara hringinn í kringum landið. Í framhaldinu er stefnan tekin á því  að því að nýta rými flugstöðva á Íslandi til að styðja við ungt listafólk á hverjum stað og gera því mögulegt að koma verkum sínum á framfæri þar.

 

Í kynningu segir: - Listamaðurinn Tolli er ekki þekktur fyrir að fara troðnar slóðir þegar kemur að sköpuninni, framsetningu á listinn eða vali á sýningarrými. Síðustu misseri hefur málarinn sótt aftur í ræturnar og ferðast um landið en hann hefur oft talað um það að árin sem farandverkamaður hafi mótað hann mikið á yngri árum.

 

Það kemur fram í listinni um leið og það landsbyggðina togar sífellt í hann. Tolli hefur sýnt víða, í yfirgefnum verksmiðjum, tónlistarhúsum og í verslunarmiðstöðvum. „Mér finnst áríðandi að fara með listina á vettvang. Hafa hana ekki fast í sínu verndaða umhverfi sýningarsalanna í borginni. Heldur fara með hana til fólksins.“

 

„Ég ryð brautina og vinn með Isavia í því að gera flugstöðvarnar sýningavænar og nota mína list til að venja farþega og ferðalanga við hugmyndina að búið að sé að setja upp sýningarrými í þessum fallegu byggingum. Svo koma flottir ungir listamenn sem eru að springa úr sköpunarkrafti og fylla þessi rými af enn meiri gleði,“ sagði Tolli.